જમ્મુ-કાશ્મીરના ગુલમર્ગમાં આતંકીઓએ સેનાના બે વાહનો પર હુમલો (Gulmarg Attack) કર્યો છે. આ આતંકવાદી હુમલામાં સેનાના બે જવાન શહીદ થયા હતા, જ્યારે બે સિવિલ પોર્ટરના પણ મોત થયા હતા. હુમલામાં ઘણા જવાનો ઘાયલ પણ થયા છે. જેમાંથી ઘણાની હાલત નાજુક હોવાનું કહેવાય છે. ઘાયલ જવાનોને નજીકની હોસ્પિટલમાં દાખલ કરવામાં આવ્યા છે, જ્યાં તેમની સારવાર કરવામાં આવી રહી છે. જો કે હુમલા બાદ આતંકીઓ ત્યાંથી ભાગી ગયા હતા. સેનાએ આતંકીઓને શોધવા માટે પોતાની કડકાઈ વધારી દીધી છે.સત્તાવાર સૂત્રોએ જણાવ્યું કે આતંકવાદીઓએ સાંજે ગુલમર્ગ સ્કી રિસોર્ટ નજીક બોટાપથરી વિસ્તારમાં નાગીન ચોક ખાતે રાષ્ટ્રીય રાઈફલ્સ (RR)ના એક વાહન પર ગોળીબાર કર્યો હતો. એક અધિકારીએ જણાવ્યું કે, વિસ્તારને કોર્ડન કરી લેવામાં આવ્યો છે અને વધારાના સુરક્ષા દળોને મોકલવામાં આવ્યા છે. આ પહેલા ગુરુવારે પુલવામા જિલ્લાના ત્રાલ વિસ્તારમાં આતંકવાદીઓએ ઉત્તર પ્રદેશના એક મજૂર પર ગોળીબાર કરીને તેને ઘાયલ કર્યો હતો. કામદારને સામાન્ય ઈજા થઈ છે.
