ગાંધીનગર શહેર વિસ્તારમાં સમાવિષ્ટ ગામોમાં તંત્ર દ્વારા યોગ્ય વ્યવસ્થા ઉભી કરવામાં નહીં આવતા અનેક મુશ્કેલીઓનો સામનો સ્થાનિક રહીશોને કરવો પડી રહ્યો છે.શહેરી વિસ્તારના લોકોને અવરજવરમાં સાનુકૂળતા મળી શકે તે માટે નવા માર્ગ બનાવવામાં આવ્યા હતા.ત્યારે વરસાદી પાણીનો યોગ્ય રીતે નિકાલ થઈ શકે તે માટેની સુવિધા ઉભી કરવામાં નહીં આવતા તાજેતરમાં થયેલા વરસાદમાં માર્ગ પાણીમાં ધોવાઈ ગયા છે. તંત્ર દ્વારા જે કામગીરી કરવામાં આવી રહી છે.તે ચોમાસાની મોસમમાં ધોવાઈ જતા ગુણવત્તા સામે પણ અનેક સવાલ ઊભા થઈ રહ્યા છે.ગાંધીનગરના માર્ગો ઉપરથી વાહનચાલકોને અવરજવર કરવામાં સરળતા મળી શકે તે માટે તંત્ર દ્વારા માર્ગ બનાવવામાં આવ્યા હતા.જેની પાછળ લાખો રૃપિયાનો ખર્ચ પણ કરાયો હતો. હવે ચોમાસાની મોસમમાં વરસાદ પડતા જ કામગીરીની પોલ ખુલી ગઈ હોય તે પ્રકારે કોર્પોરેશન વિસ્તારમાં આવેલા રાયસણ થી ધોળાકુવા મેટ્રો સુધીનો માર્ગ વરસાદમાં ધોવાઈ રહ્યો છે.તો માર્ગોની આસપાસ વરસાદી પાણીનો યોગ્ય રીતે નિકાલ થઈ શકે એ માટેની સુવિધા ઉભી કરવામાં નહીં આવતા માર્ગ ઉપર વરસાદી પાણી ભરાઈ જાય છે. માર્ગ વરસાદી પાણીમાં ધોવાઈ જતા હાલમાં ઉબડખાબડ બની ગયો છે.
