મહારાષ્ટ્રના વગદાર રાજકીય અગ્રણીઓમાં રીતેશ દેશમુખના પરિવારનું નામ મોખરે છે. રીતેશ દેશમુખના પિતા વિલાસરાવ દેશમુખ મહારાષ્ટ્રના પૂર્વ મુખ્યમંત્રી હતા. પિતાના પગલે રાજકારણમાં શરૂઆત કરવાના બદલે રીતેશે ફિલ્મોમાં કરિયર બનાવી છે. રીતેશે ચૂંટણી દરમિયાન કોંગ્રેસ માટે અને પોતાના ભાઈઓ માટે પ્રચાર કર્યો હતો, પરંતુ સક્રિય રાજકારણમાં ઝૂકાવ્યું ન હતું. રીયલ લાઈફમાં રાજકારણી બનવાનું ટાળી રહેલા રિતેશે રીલ લાઈફમાં ખૂંખાર રાજકારણી દાદાભાઈનો રોલ કર્યો છે. અજય દેવગનની આગામી ફિલ્મ ‘રેઈડ 2’માં રીતેશ દેશમુખનો નવો અવતાર જોવા મળશે.
‘રેઈડ 2’માં પોતાના કેરેક્ટરનો પરિચય આપતું પોસ્ટર રીતેશ દેશમુખે શેર કર્યું હતું. જેમાં રીતેશે લખ્યુ હતું કે, કાનૂન કા મોહતાજ નહીં, કાનૂન કા માલિક હૈ દાદા ભાઈ. રેઈડ 2 પહેલી મેથી નજીકના સિનેમા ઘરોમાં. પોસ્ટરમાં રીતેશ દેશમુખ ભીડને વચ્ચે ઊભેલો છે અને હાથ ઊંચો કરી પોતાની સત્તા અને આત્મવિશ્વાસની ઝલક આપે છે. રીતેશના ફર્સ્ટ લૂકને શેર કરતાં અગાઉ IRS ઓફિસર અમય પટનાઈકના રોલમાં અજય દેવગનની નવી સફર અંગે વાત કરતું પોસ્ટર મેકર્સે શેર કર્યું હતું. નવા શહેર અને નવી ફાઈલ સાથે અમય પટનાઈકની નવી રેઈડ માટે સજ્જ રહેવા ઓડિયન્સને કહેવાયું છે.
