ગાંધીનગરના આંગણે સાબરમતીના તટ પર આકાર પામેલું ‘ગુજરાત ઇન્ટરનેશનલ ફાઇનાન્સ ટેક-સિટી’ એટલે કે GIFT સિટી, એ માત્ર એક આધુનિક શહેર નથી, પરંતુ 21 મી સદીના સમર્થ ભારતની આર્થિક મહત્વાકાંક્ષાનું જીવંત પ્રતીક છે. વડાપ્રધાન નરેન્દ્ર મોદીના વિઝનરી નેતૃત્વ હેઠળ જ્યારે આ પ્રોજેક્ટનો પાયો નખાયો, ત્યારે ઉદ્દેશ્ય સ્પષ્ટ હતો: ભારતને વિશ્વના નકશા પર એક એવું ‘ગ્લોબલ ફાઇનાન્સિયલ ગેટવે’ પૂરું પાડવું જે દુબઈ, સિંગાપોર અને લંડન જેવા આંતરરાષ્ટ્રીય નાણાકીય કેન્દ્રો સાથે સીધી સ્પર્ધા કરી શકે. આજે આ શહેર અત્યાધુનિક ઇન્ફ્રાસ્ટ્રક્ચર, આઇટી હબ અને નાણાકીય સેવાઓનો એક એવો સંગમ બની ચૂક્યું છે, જે ભારતની અર્થવ્યવસ્થાને નવી ઊંચાઈઓ પર લઈ જવા માટે સજ્જ છે.
ગુજરાતનું પાટનગર ગાંધીનગર આજે માત્ર વહીવટી કેન્દ્ર નથી રહ્યું, પરંતુ તે વિશ્વના નકશા પર એક શક્તિશાળી ફાઇનાન્સ અને IT હબ તરીકે અંકિત થઈ ગયું છે. Gujarat International Finance Tech City (GIFT City) આજે ભારતનું પ્રથમ સંપૂર્ણ કાર્યરત આંતરરાષ્ટ્રીય નાણાકીય સેવા કેન્દ્ર-The International Financial Services Centres Authority (IFSCA) બનીને વૈશ્વિક સ્પર્ધામાં દુબઈ, સિંગાપોર અને હોંગકોંગ જેવા શહેરોની હરોળમાં ઊભું છે.
GIFT City : દૂરંદેશી નેતૃત્વનું સાકાર થયેલું સ્વપ્ન
ગિફ્ટ સિટીની પરિકલ્પના વડાપ્રધાન શ્રી નરેન્દ્ર મોદીએ ગુજરાતના મુખ્યમંત્રી તરીકે કરી હતી. તેમનું વિઝન ભારતને એક એવું પ્લેટફોર્મ પૂરું પાડવાનું હતું જ્યાં નાણાકીય સેવાઓ, અત્યાધુનિક ટેકનોલોજી અને સરળ નિયમનકારી માળખું એક જ છત નીચે મળે. આજે મુખ્યમંત્રી શ્રી ભૂપેન્દ્ર પટેલના નેતૃત્વ હેઠળ આ વિઝન વધુ વ્યાપક બન્યું છે, જે ગુજરાતને ભારતના આર્થિક વિકાસના એન્જિન તરીકે સ્થાપિત કરે છે.
