હિમાચલ પ્રદેશમાં છેલ્લા ત્રણ દિવસથી ખરાબ મોસમને કારણે લોકોની પરેશાનીનો પાર નથી ત્યારે છેલ્લા ૨૪ કલાકમાં બે સ્થળે વાદળ ફાટતાં આવેલા વરસાદ અને ભારે બરફવર્ષાને કારણે જનજીવન ઠપ થઈ ગયું છે. કુલુમાં રસ્તાઓ પર પૂરનાં પાણીમાં સેંકડો વાહનો તણાઈ ગયાં છે. કુલુમાં ભારે વરસાદને કારણે કુદરતનું રૌદ્ર સ્વરૂપ જોવા મળ્યું છે. ભારે વરસાદને કારણે ભૂતનાથ નાળામાં અનેક વાહનો તણાઈ ગયાં હતાં. ગાંધીનગર વિસ્તારમાં અનેક વાહનો કાટમાળમાં દટાઈ ગયાં છે. ત્યાંની તમામ સ્કૂલો બંધ કરી દેવામાં આવી છે અને ઑરેન્જ અલર્ટ જાહેર કરવામાં આવી છે. ભુંતરની સબ્ઝીમંડી પાણીમાં ડૂબી ગઈ છે.
લાહૌલ સ્પીતિ, ચંબા-પાંગી અને કિન્નૌર જિલ્લામાં મોટા ભાગના રસ્તા બરફવર્ષાને કારણે બંધ કરી દેવામાં આવ્યા છે. સાત જિલ્લામાં ફ્રેશ સ્નોફૉલ થયો છે. કુલુ, કાંગડા અને ચંબામાં ઘણા નુકસાનની જાણકારી મળી રહી છે. આ ત્રણ જિલ્લાઓમાં સૌથી વધારે વરસાદ થતાં નદીઓમાં પૂર આવ્યાં છે.
