ગુજરાતમાં બનેલી એક આંચકાજનક ઘટનામાં મેડિકલના પ્રથમ વર્ષના વિદ્યાર્થીનું કથિત રેગિંગના કારણે મોત થયું હોવાથી હોબાળો મચી ગયો છે. પાટણના ધારપુરમાં આવેલી GMERS મેડિકલ કોલેજ એન્ડ હોસ્પિટલમાં મેડિકલના પ્રથમ વર્ષમાં અભ્યાસ કરતાં 18 વર્ષીય એક વિદ્યાર્થી સાથે કથિત રેગિંગ થયું હોવાનું સામે આવ્યું છે. જેમાં કોલેજના સિનિયર વિદ્યાર્થીઓ દ્વારા કથિત રેગિંગમાં ત્રણ કલાક સુધી ઊભો રાખવામાં આવ્યો હોવાના કારણે આ વિદ્યાર્થીનું મોત થયું હોવાનું કહેવામાં આવી રહ્યું છે. આ અંગે GMERS મેડિકલ કોલેજ અને હોસ્પિટલના ડીન ડોક્ટર હાર્દિક શાહે જણાવ્યું હતું કે આ ઘટનામાં તપાસ શરૂ કરી દેવામાં આવી છે. શાહે મીડિયાને જણાવ્યું હતું કે, અનિલ મેથાણીયા નામનો 18 વર્ષના વિદ્યાર્થીને શનિવારે રાત્રે સિનિયર્સ દ્વારા કરવામાં આવેલા કથિત રેગિંગમાં ત્રણ કલાક સુધી ઊભો રાખવામાં આવ્યો હતો અને બાદમાં તેનું મોત થયું હતું. એન્ટિ-રેગિંગ 15 સિનિયર વિદ્યાર્થીઓને બોલાવ્યા હતા અને તેમના નિવેદનો પ્રથમ વર્ષના વિદ્યાર્થીઓ સાથે મેળ ખાતા હતા. તમામ 15 વિદ્યાર્થીઓને હોસ્ટેલ અને શૈક્ષણિક પ્રવૃત્તિઓમાંથી સસ્પેન્ડ કરવામાં આવ્યા હતા અને પોલીસ ફરિયાદ દાખલ કરવામાં આવી હતી. આ કેસમાં 15 સિનિયર વિદ્યાર્થીઓને સસ્પેન્ડ કરવામાં આવ્યા છે. પોલીસે 15 સિનિયર વિદ્યાર્થીઓની અટકાયત કરી છે અને તેમની ટૂંક સમયમાં ધરપકડ કરવામાં આવી શકે છે.
