ગુજરાતની રાજધાની ગાંધીનગરમાં યોજાયેલી GREENS 2026 સમિટ દરમિયાન નિષ્ણાતોએ દેશના ઊર્જા ક્ષેત્રને લઈને એક મહત્વપૂર્ણ ચેતવણી આપી છે. તેમના જણાવ્યા અનુસાર, ભારતમાં સોલાર ઊર્જાના વધતા ઉપયોગને કારણે આગામી વર્ષોમાં સોલાર પેનલના કચરાનું પ્રમાણ ઝડપથી વધશે અને વર્ષ 2047 સુધીમાં તે આશરે 11 મિલિયન મેટ્રિક ટન સુધી પહોંચી શકે છે. નિષ્ણાતોએ જણાવ્યું કે જો સમયસર યોગ્ય આયોજન કરવામાં નહીં આવે તો આ કચરો પર્યાવરણ માટે ગંભીર પડકાર બની શકે છે.
સમિટમાં દેશભરના ઊર્જા નિષ્ણાતો, પર્યાવરણવિદો, ઉદ્યોગપતિઓ અને નીતિ નિર્માતાઓએ ભાગ લીધો હતો. ચર્ચા દરમિયાન જણાવવામાં આવ્યું કે ભારત હાલમાં નવનીકરણીય ઊર્જા ક્ષેત્રમાં ઝડપથી આગળ વધી રહ્યું છે. કાર્બન ઉત્સર્જન ઘટાડવા અને સ્વચ્છ ઊર્જાને પ્રોત્સાહન આપવા માટે દેશભરમાં મોટા પાયે સોલાર પ્રોજેક્ટ્સ સ્થાપિત થઈ રહ્યા છે. જોકે, સોલાર પેનલની સરેરાશ આયુષ્ય 20થી 25 વર્ષ જેટલી હોય છે. ત્યારબાદ આ પેનલો ઉપયોગ માટે યોગ્ય રહેતી નથી અને કચરામાં ફેરવાઈ જાય છે.
