આજે બંધારણ દિવસના અવસર પર રાષ્ટ્રપતિ દ્રૌપદી મુર્મુએ સંસદના સંયુક્ત સત્રને સંબોધિત કર્યું. આ સંયુક્ત સત્ર સંસદના સેન્ટ્રલ હોલમાં યોજાયું હતું. મંગળવારે દેશમાં બંધારણ લાગુ થયાને 75 વર્ષ પૂર્ણ થયા છે. આ દરમિયાન રાષ્ટ્રપતિ મુર્મુએ બંધારણ દિવસના અવસર પર એક ખાસ સ્મારક સિક્કો પણ બહાર પાડ્યો હતો. રાષ્ટ્રપતિએ ખાસ ટપાલ ટિકિટ પણ બહાર પાડી. બંધારણ દિવસના અવસરે રાષ્ટ્રપતિ દ્રૌપદી મુર્મુ, પીએમ મોદી, ઉપરાષ્ટ્રપતિએ સંસ્કૃત ભાષામાં બંધારણની નકલનું વિમોચન કર્યું.
બંધારણ દિવસ પર પોતાના સંબોધનમાં રાષ્ટ્રપતિએ કહ્યું કે બંધારણ દિવસના શુભ અવસર પર તમારી વચ્ચે આવીને હું ખૂબ જ ખુશ છું. આજે આપણે બધા એક ઐતિહાસિક અવસરના સહભાગી બની રહ્યા છીએ. 75 વર્ષ પહેલા, સંસદના આ જ ચેમ્બરમાં દેશના બંધારણનો મુસદ્દો ઘડવાનું એક વિશાળ કાર્ય પૂર્ણ થયું હતું અને આ જ દિવસે આ બંધારણનો સ્વીકાર કરવામાં આવ્યો હતો.
બંધારણ એ આપણા લોકતાંત્રિક મૂલ્યોનો પાયાનો પથ્થર છે. આજે, કૃતજ્ઞ રાષ્ટ્ર વતી, હું બંધારણ સભાના સભ્યોને શ્રદ્ધાંજલિ અર્પણ કરું છું. બાબા આંબેડકરે બંધારણ સભાનું નેતૃત્વ કર્યું હતું. ભારત લોકશાહીની માતા છે. આ ભાવનાથી જ અમે આ ખાસ અવસર પર ભેગા થયા છીએ. પડદા પાછળ રહીને કામ કરનારા અધિકારીઓના અમૂલ્ય યોગદાનને પણ આપણે યાદ રાખવું જોઈએ. જેમાં મુખ્ય ભૂમિકા બીએન રાવ દ્વારા ભજવવામાં આવી હતી, જેઓ બંધારણ સભાના સલાહકાર હતા.
