ગાંધીનગર: કેન્દ્રિય ગૃહમંત્રી અમિત શાહના હસ્તે ગાંધીનગરથી ‘ભારત ટેક્સી’ સેવાનો પ્રારંભ કરવામાં આવ્યો છે. આ સેવા રાજ્યના અનેક શહેરોમાં તબક્કાવાર શરૂ કરવામાં આવશે. સહકારી ક્ષેત્રના મોડલ પર આધારિત આ ટેક્સી સેવા દ્વારા મુસાફરોને સુરક્ષિત, વિશ્વસનીય અને વાજબી દરે પરિવહનની સુવિધા ઉપલબ્ધ કરાવવાનો ઉદ્દેશ છે.
સરકારના જણાવ્યા મુજબ આ પહેલથી સ્થાનિક ડ્રાઈવરોને રોજગારીની નવી તકો મળશે તેમજ શહેરી પરિવહન વ્યવસ્થામાં વધુ પારદર્શિતા અને ટેક્નોલોજી આધારિત સેવા ઉપલબ્ધ બનશે. ઓનલાઈન બુકિંગ અને ડિજિટલ પેમેન્ટ જેવી સુવિધાઓ પણ આ સેવામાં ઉપલબ્ધ રહેશે.
રાજ્ય સરકારનું માનવું છે કે ‘ભારત ટેક્સી’ સહકારી ક્ષેત્રને વધુ મજબૂત બનાવવાની સાથે નાગરિકોને ગુણવત્તાયુક્ત પરિવહન સેવા પૂરી પાડવામાં મહત્વપૂર્ણ ભૂમિકા ભજવશે. આગામી સમયમાં અન્ય શહેરોમાં પણ આ સેવાનો વ્યાપ વધારવાની યોજના છે.
