રીયલ લાઇફ કપલ અલી ફઝલ અને રિચા ચઢ્ઢા હવે પહેલી વખત મોટા પડદા પર લીડ જોડી તરીકે સાથે જોવા મળશે. બંને શશી વર્મા દ્વારા નિર્દેશિત એક સિચ્યુએશનલ કોમેડી ફિલ્મમાં મુખ્ય ભુમિકામાં જોવા મળશે. જોકે, હજુ આ ફિલ્મનું નામ નક્કી થયું નથી. અગાઉ બંને લોકપ્રિય કલાકારો ફુકરે ફ્રેન્ચાઇઝીમાં સાથે કામ કરી ચૂક્યા છે, પરંતુ પહેલી વખત તેઓ એકબીજા સાથે રોમેન્ટિક લીડ રોલમાં સ્ક્રીન શેર કરશે.
સીનવર્ક પ્રોડક્શન્સ અને ગિરિરાજ પ્રોડક્શન્સના બેનર હેઠળ બની રહેલી આ ફિલ્મમાં દિગ્ગજ અભિનેતા કુમુદ મિશ્રા પણ મહત્વપૂર્ણ ભૂમિકામાં જોવા મળશે. દિલ્હીની જીવંત અને અવ્યવસ્થિત પૃષ્ઠભૂમિ પર આધારિત આ ફિલ્મમાં હાસ્ય, લાગણીઓ અને સામાજિક સંદેશનો અનોખો સમન્વય જોવા મળશે.
અભિનેતા, લેખક અને દિગ્દર્શક તરીકે પોતાની ઓળખ બનાવી ચૂકેલા શશી વર્મા આ ફિલ્મનું દિગ્દર્શન કરશે. ફિલ્મનું શૂટિંગ 2026ના બીજા ભાગમાં શરૂ થવાનું છે, જ્યારે એપ્રિલ 2027માં તેની થિયેટ્રિકલ રિલીઝ માટે આયોજન કરવામાં આવ્યું છે.
ફિલ્મ અંગે ઉત્સાહ વ્યક્ત કરતાં અલી ફઝલે જણાવ્યું, “મને હંમેશા લાગ્યું છે કે શ્રેષ્ઠ કોમેડી સાચા પાત્રો અને વાસ્તવિક પરિસ્થિતિઓમાંથી જન્મે છે. સ્ક્રિપ્ટ વાંચતા જ મને લાગ્યું કે આ ફિલ્મમાં કંઈક ખાસ છે. રિચા સાથે પહેલી વખત એક નવી સ્ક્રીન ડાયનેમિક્સ અજમાવવાની તક મળી છે, જે મારા માટે ખૂબ જ રોમાંચક છે. ઉપરાંત, શશી સર સાથે કામ કરવાની મારી લાંબા સમયથી ઇચ્છા હતી.”
