ઊંઝા તાલુકાના રામપુરાથી દાસજ રોડ વચ્ચે ફેક્ટરીમાં વરિયાળીમાંથી અખાદ્ય બનાવટી જીરું બનાવવાતું હોવાની બામતી આધારે મહેસાણા એલસીબીની ટીમે મંગળવારે રાત્રે રેડ કરી હતી. જેમાં બનાવટી જીરું બનાવવા માટે વપરાતી સામગ્રી, શંકાસ્પદ જીરું, વરિયાળી વગેરે મળી આવતાં ફૂડ એન્ડ ડ્રગ્સ વિભાગને બોલાવી વિવિધ આઠ સેમ્પલ લેવાયાં હતાં અને શંકાસ્પદ જીરું, વરિયાળી, વિવિધ પાવડર, ગોળની રસી સહિત રૂ.૮૧ લાખથી વધુનો મુદ્દામાલ સીઝ કરાયો હતો.
ઊંઝાના રામપુરાથી દાસજ રોડ પર આવેલી ઉમા એન્ટરપ્રાઈઝ ફેક્ટરીમાં પટેલ મહેશભાઈ નટવરભાઈ અને પટેલ ભાર્ગવકુમાર પ્રવીણભાઈ વરિયાળીમાંથી ગેરકાયદે બનાવટી અખાદ્ય જીરું તેમજ વરિયાળીમાં કલર ભેળવી લીલા રંગવાળી વરિયાળી બનાવતા હોવાની બાતમી મહેસાણા એલસીબીના એએસઆઈ ડાહ્યાભાઈ તથા હે.કો. હેમેન્દ્રસિંહને મળી હતી. જેથી પીઆઈ જે.જી.વાઘેલાની સૂચનાથી પીએસઆઈ એમ.બી.પઢિયાર સહિત સ્ટાફે મંગળવારે રાત્રે ઉમા એન્ટરપ્રાઈઝ ફેક્ટરીમાં રેડ કરી હતી. જેમાં મહેશ પટેલ તથા ભાર્ગવ પટેલ હાજર મળી આવ્યા હતા. જેઓ મજૂરો રાખીને શંકાસ્પદ જીરું અને શંકાસ્પદ વરિયાળી બનાવતા હોવાનું જણાયું હતું. ફેક્ટરીમાંથી વરિયાળીમાંથી જીરું બનાવેલી શંકાસ્પદ બેગો, ચોખ્ખી કરેલી વરિયાળી, પ્રોસેસ કરેલી વરિયાળી, વેસ્ટ વરિયાળી તથા વરિયાળીનું ભૂસું તેમજ અલગ અલગ ઉપયોગમાં લેવાતા પાવડર, ગોળની રસી, કંતાનના ખાલી કોથળા મળીને કુલ રૂ.81,03,200નો શંકાસ્પદ મુદ્દામાલ મળી આવ્યો હતો. જેથી પોલીસે એફએસએલ અધિકારી તેમજ ફૂડ એન્ડ ડ્રગ્સ વિભાગના અધિકારીઓને સ્થળ પર બોલાવ્યા હતા. જેમણે વિવિધ આઠ નમૂના લઈ પરીક્ષણ માટે મોકલવાની તજવીજ હાથ ધરી હતી. તેમજ તેમની હાજરમાં ફેક્ટરીના ગોડાઉનોમાં ઉપરોક્ત મુદ્દામાલ રાખીને ગોડાઉનો તથા ફેક્ટરી સીલ કરાઈ હતી. વધુ તપાસ માટે ઊંઝા પોલીસ મથકે જાણવાજોગ નોંધ કરી આગળની કાર્યવાહી હાથ ધરાઈ છે.
