બેંગલુરુમાં 18 સપ્ટેમ્બરે સંરક્ષણ મંત્રી રાજનાથ સિંહ અને નાગરિક ઉડ્ડયન મંત્રી કે. રામમોહન નાયડુની હાજરીમાં હસ્તાંતરણ
બેંગલુરુ, 17 સપ્ટેમ્બર: ભારતના સ્વદેશી એરોસ્પેસ અને સંરક્ષણ ક્ષેત્ર માટે મહત્વપૂર્ણ સિદ્ધિરૂપે હિન્દુસ્તાન એરોનોટિક્સ લિમિટેડ (HAL) દ્વારા ભારતીય વાયુસેનાને (IAF) LCA તેજસ FOC ટ્વિન-સીટર ટ્રેનર અને HTT-40 બેઝિક ટ્રેનર એરક્રાફ્ટ સોંપવામાં આવશે. આ ઉપરાંત પવન હંસ લિમિટેડ (PHL)ને ધ્રુવ નેક્સ્ટ જનરેશન (NG) હેલિકોપ્ટર પણ સોંપવામાં આવશે.
આ હસ્તાંતરણ સમારોહ 18 સપ્ટેમ્બર, 2026ના રોજ બેંગલુરુ, કર્ણાટકમાં સંરક્ષણ મંત્રી શ્રી રાજનાથ સિંહ અને નાગરિક ઉડ્ડયન મંત્રી શ્રી કે. રામમોહન નાયડુની ઉપસ્થિતિમાં યોજાશે.
આ કાર્યક્રમ ભારતની આત્મનિર્ભરતા તરફની યાત્રામાં મહત્વપૂર્ણ માઈલસ્ટોન માનવામાં આવે છે. HAL અને તેના ઉદ્યોગ ભાગીદારો દ્વારા દેશના સ્વદેશી એરોસ્પેસ ઇકોસિસ્ટમને મજબૂત બનાવવા માટે કરવામાં આવી રહેલા પ્રયાસોને પણ આ પ્રસંગે ઉજાગર કરવામાં આવશે. સાથે જ સૈન્ય તેમજ નાગરિક ઉપયોગ માટે અદ્યતન એરક્રાફ્ટ અને હેલિકોપ્ટરનું ડિઝાઇન, વિકાસ અને ઉત્પાદન કરવાની ભારતની વધતી ક્ષમતા પણ પ્રદર્શિત થશે.
સમારોહમાં ચીફ ઓફ ધ એર સ્ટાફ એર ચીફ માર્શલ એ.પી. સિંહ, સંરક્ષણ ઉત્પાદન સચિવ સંજીવ કુમાર, નાગરિક ઉડ્ડયન મંત્રાલયના સચિવ સમીર કુમાર સિન્હા, HALના CMD રવિ કે. સહિત સંરક્ષણ અને નાગરિક ઉડ્ડયન મંત્રાલયના વરિષ્ઠ અધિકારીઓ, IAF, PHL, નિયમનકારી સંસ્થાઓ તેમજ એરોસ્પેસ અને ડિફેન્સ ક્ષેત્ર સાથે સંકળાયેલા પ્રતિનિધિઓ ઉપસ્થિત રહેશે.
સરકારે એરોસ્પેસ અને સંરક્ષણ ક્ષેત્રમાં સ્વદેશી ડિઝાઇન, વિકાસ અને ઉત્પાદનને પ્રાથમિકતા આપી છે. તેજસ, HTT-40 અને ધ્રુવ NG જેવા સ્વદેશી પ્લેટફોર્મનો સમાવેશ દેશની સ્થાનિક ક્ષમતાને વધુ મજબૂત બનાવવાની સાથે વિદેશી સ્ત્રોતો પરની નિર્ભરતા ઘટાડવાની દિશામાં વધુ એક મહત્વપૂર્ણ પગલું છે.
