ઉત્તર ભારતના મોટાભાગના ભાગોમાં તાજેતરમાં ભારે વરસાદ પડ્યો છે, પરંતુ હાલમાં વધુ વરસાદના કોઈ સંકેત નથી. હવામાન વિભાગે આગાહી કરી છે કે આગામી દિવસોમાં વિવિધ રાજ્યોમાં આ હવામાન પેટર્ન ચાલુ રહેશે. જે સ્પષ્ટપણે દર્શાવે છે કે અઠવાડિયાની અનિયમિત ચોમાસાની પ્રવૃત્તિ પછી અલ નીનો ભારતના હવામાન પર અસર કરવાનું શરૂ કરી રહ્યું છે.વૈજ્ઞાનિકોએ અગાઉ ચેતવણી આપી હતી કે અલ નીનો ભારત અને તેના ચોમાસાને અસર કરશે, જેના કારણે વરસાદમાં નોંધપાત્ર ઘટાડો થશે. હવામાન એક્સપર્ટોએ ફરી ચેતવણી આપી છે કે પેસિફિક મહાસાગરમાં વિકસતી અલ નીનો સ્થિતિ ધીમે ધીમે તીવ્ર બની રહી છે. આ જ કારણ છે કે દેશના મોટાભાગના ભાગોમાં વરસાદની ગતિવિધિ નબળી પડી રહી હોય તેવું લાગે છે.
