હવામાન વિભાગ દ્વારા ગુજરાતમાં ફરી એકવાર કમોસમી વરસાદની આશંકા વ્યક્ત કરવામાં આવી છે. રાજ્યમાં સર્જાયેલા સાયક્લોનિક સર્ક્યુલેશન ના કારણે વાતાવરણમાં પલટો આવશે. આગામી 19 થી 21 એપ્રિલ દરમિયાન રાજ્યના વિવિધ ભાગોમાં હળવાથી મધ્યમ વરસાદની આગાહી કરવામાં આવી છે. ખાસ કરીને સૌરાષ્ટ્ર અને મધ્ય ગુજરાતના જિલ્લાઓમાં માવઠાની અસર જોવા મળી શકે છે.
Gujarat Unseasonal Rain: 19 અને 20 એપ્રિલે ક્યાં પડશે વરસાદ?
હવામાન વિભાગની યાદી મુજબ, 19મી એપ્રિલે સૌરાષ્ટ્રના અમરેલી અને ભાવનગરમાં વરસાદી માહોલ રહેશે. આ ઉપરાંત પૂર્વ ગુજરાતના દાહોદ, છોટાઉદેપુર અને મહીસાગર જિલ્લામાં પણ ગાજવીજ સાથે વરસાદ પડી શકે છે. 20મી એપ્રિલના રોજ પણ આ સિલસિલો યથાવત રહેશે, જેમાં અમરેલી, ભાવનગર અને દાહોદ ઉપરાંત દક્ષિણ ગુજરાતના તાપી અને ડાંગ જિલ્લાનો પણ સમાવેશ થાય છે. આ કમોસમી વરસાદને કારણે ખેડૂતોમાં ચિંતા વ્યાપી ગઈ છે.
21મી એપ્રિલે સૌરાષ્ટ્ર-મધ્ય ગુજરાતમાં અસર
આગાહીના ત્રીજા દિવસે એટલે કે 21મી એપ્રિલે વરસાદનો વ્યાપ વધી શકે છે. આ દિવસે સૌરાષ્ટ્ર (Saurashtra) અને મધ્ય ગુજરાતના મોટાભાગના વિસ્તારોમાં વાદળછાયું વાતાવરણ રહેવાની અને છૂટાછવાયા વરસાદી ઝાપટાં પડવાની શક્યતા છે. પવનની ગતિમાં ફેરફાર અને ભેજવાળા વાતાવરણને કારણે તાપમાનમાં આંશિક ઘટાડો નોંધાઈ શકે છે, પરંતુ માવઠું પાકને નુકસાન પહોંચાડી શકે છે.
