નવી દિલ્હી, 23 સપ્ટેમ્બર 2026: સંરક્ષણ મંત્રાલયે ભારતીય વાયુસેના (IAF) માટે 160 સેટેલાઇટ સ્માર્ટ એન્ટી-એરફિલ્ડ વેપન્સ (SAT-SAAW) અને સંબંધિત સાધનોની ખરીદી માટે ભારત ડાયનેમિક્સ લિમિટેડ (BDL) સાથે ₹810.79 કરોડનો કરાર કર્યો છે. આ કરાર ‘Buy (Indian – Indigenously Designed, Developed and Manufactured)’ કેટેગરી હેઠળ કરવામાં આવ્યો છે.
નવી દિલ્હીમાં 23 સપ્ટેમ્બરે સંરક્ષણ સચિવ રાજેશ કુમાર સિંહની હાજરીમાં કરાર પર હસ્તાક્ષર કરવામાં આવ્યા હતા.
SAT-SAAW એ હવાથી જમીન પર પ્રહાર કરી શકતું ચોકસાઈપૂર્વક માર્ગદર્શિત ગ્લાઇડ બોમ્બ છે. તેને જેગુઆર, હોક અને સુ-30 MKI જેવા વિમાનો પરથી લોન્ચ કરી શકાય છે. આ હથિયાર લાંબા અંતરેથી દુશ્મનના એરફિલ્ડને નિશાન બનાવવાની ક્ષમતા ધરાવે છે.
આ સિસ્ટમનું ડિઝાઇન અને વિકાસ DRDO દ્વારા સ્વદેશી રીતે કરવામાં આવ્યું છે. તેમાં આશરે 60 ટકા સ્વદેશી સામગ્રી હશે. ઉપરાંત, Initial Measurement Unit, Long Impact Delay Fuse અને Twin Store Carrier જેવા સબ-સિસ્ટમનું પણ દેશમાં જ ઉત્પાદન કરવામાં આવશે.
SAT-SAAWની ડિલિવરી 2027-28થી 2028-29 દરમિયાન કરવામાં આવવાની છે. તેની ભારતીય વાયુસેનામાં સામેલગીરીથી લાંબા અંતરની ચોકસાઈભરી પ્રહાર ક્ષમતામાં વધારો થશે અને દેશની સંરક્ષણ તૈયારીઓને વધુ મજબૂતી મળશે.
આ કરાર સંરક્ષણ ક્ષેત્રે સ્વદેશી ડિઝાઇન, વિકાસ અને ઉત્પાદનને પ્રોત્સાહન આપવાની સાથે ‘આત્મનિર્ભર ભારત’ અને સંરક્ષણ આત્મનિર્ભરતાને વધુ વેગ આપશે.
