પોરબંદર, 19 સપ્ટેમ્બર 2026: ભારતીય કોસ્ટ ગાર્ડ દ્વારા પૃથ્વી વિજ્ઞાન મંત્રાલય (MoES)ના સહયોગથી આજે પોરબંદરની ચોપાટી બીચ ખાતે ઇન્ટરનેશનલ કોસ્ટલ ક્લીનઅપ (ICC) ડે–2026 અંતર્ગત વિશાળ સફાઈ અભિયાન યોજાયું હતું. આ વર્ષે અભિયાનની વૈશ્વિક થીમ “સ્વચ્છ સાગર–સુરક્ષિત સાગર 2026” (SSSS 5.0) રાખવામાં આવી હતી.
દર વર્ષે સપ્ટેમ્બર મહિનાના ત્રીજા શનિવારે યોજાતા આ વૈશ્વિક અભિયાનનો મુખ્ય ઉદ્દેશ દરિયાઈ કચરો ઘટાડવા, સમુદ્રના સંરક્ષણ અંગે જનજાગૃતિ વધારવા અને દરિયાઈ પર્યાવરણને સ્વચ્છ રાખવા માટે સામૂહિક પ્રયાસોને પ્રોત્સાહન આપવાનો છે. ભારતીય કોસ્ટ ગાર્ડ વર્ષ 2006થી સમગ્ર દેશમાં ઇન્ટરનેશનલ કોસ્ટલ ક્લીનઅપ પ્રવૃત્તિઓનું નેતૃત્વ કરી રહ્યું છે.
પોરબંદરની દરિયાઈ વિરાસત, સક્રિય માછીમાર સમુદાય અને સંવેદનશીલ દરિયાઈ પર્યાવરણને ધ્યાનમાં રાખીને અહીં આ અભિયાનનું આયોજન કરવામાં આવ્યું હતું. અભિયાનમાં 750થી વધુ સ્વયંસેવકોએ ઉત્સાહપૂર્વક ભાગ લીધો હતો. જેમાં શાળા-કોલેજના વિદ્યાર્થીઓ, NCC કેડેટ્સ, NGOના સભ્યો, માછીમાર સંગઠનો, સ્થાનિક નાગરિકો તથા સરકારી અધિકારીઓનો સમાવેશ થયો હતો.
સવારે ચોપાટી બીચ ખાતે સ્વયંસેવકોનું એકત્રીકરણ કરવામાં આવ્યું હતું. તમામ સહભાગીઓને ગ્લોવ્ઝ, પર્યાવરણમિત્ર કચરાની થેલીઓ, કેપ અને માસ્ક સહિતની સુરક્ષા સામગ્રી આપવામાં આવી હતી. સમગ્ર બીચને છ ઝોનમાં વહેંચીને વ્યવસ્થિત રીતે સફાઈ કામગીરી હાથ ધરવામાં આવી હતી.
સ્વયંસેવકોએ મહાનુભાવો સાથે મળીને પ્લાસ્ટિક, માછીમારીની જાળ, કાચ, ધાતુ તથા ઓર્ગેનિક કચરા સહિતનો દરિયાઈ કચરો એકત્ર કરી તેનું અલગ-અલગ વર્ગીકરણ કર્યું હતું. સફાઈ અભિયાન પૂર્ણ થયા બાદ એકત્રિત કરાયેલા વર્ગીકૃત કચરાને પોરબંદર મહાનગરપાલિકાને પ્રતીકાત્મક રીતે સોંપવામાં આવ્યો હતો.
આ અભિયાન દરમિયાન પોરબંદરના દરિયાકાંઠેથી અંદાજે 700 કિલો દરિયાઈ કચરો દૂર કરવામાં આવ્યો હતો. અભિયાનથી દરિયાઈ પ્રદૂષણ, જવાબદાર કચરા વ્યવસ્થાપન અને દરિયાઈ પર્યાવરણના સંરક્ષણ અંગે સ્થાનિક લોકોમાં જાગૃતિ વધારવામાં મહત્વપૂર્ણ યોગદાન મળ્યું હતું.
ભારતીય કોસ્ટ ગાર્ડ અને પૃથ્વી વિજ્ઞાન મંત્રાલયના સંયુક્ત નેતૃત્વ હેઠળ યોજાયેલા આ અભિયાને દરિયાઈ પર્યાવરણના સંરક્ષણ માટે સરકાર અને સમાજના સામૂહિક પ્રયાસની પ્રતિબદ્ધતાને વધુ મજબૂત બનાવી છે.
